«Қайрат-Жастар» - «Крылья Советов - Ж» 0:1
Гол: Шамаев (88’)
«Қайрат-Жастар» «Крылья Советов» клубының жастар құрамына қарсы жолдастық матч өткізді. Матч бойы қорғанған самаралықтар ойын соңында нәтижелі шабуыл жасай алды.
Александр Арефьев командасының үшінші жолдастық матчы ашық ауа-райында өтті. Жақын резервтің ойынын тамашалау үшін Алексей Шпилевскийдің бапкерлік штабы келді. «Қайрат-Жастар» ойынды өте қарқынды бастады: ойыншылар прессинг жасап, қос қапталда жылдам шабуылдады, допты Бақдәулет Жүзбайға жеткізуге тырысты. Сондай шабуылдардың бірінде Жүзбай оң аяғымен жойқын соққы жасаған, бірақ самаралықтардың қақпашысы Никита Пищулин допты маңдайшанын астынан алып шықты. Артынша, Андрей Ульшин де Пищулиннің қыралығын байқап көрді, бірақ оның соққысы биіктеу кетті. Таймның ортасына таман қайраттық жастар қарсыласты өзінің жарты алаңына тықсырып тастады, алайда допты қарсылас қақпасында тулата алмады. Арсен Буранчиевте гол соғатын жақсы мүмкіндік болды. 30-минутта Жүзбай голкипермен бірге-бір шыққан, «Крылья Советов» қақпашысының сәтті ойыны ғана ресейліктерді құтқарды. Самаралықтар 32-минутта жауап қатты, қапталдан жасалған шабуылдан соң Виктор Грязин қақпаға соққы бағыттаған. Рауан Аманжол өз қақпашысына көмекке келіп, допты қақпа сызығынан алып шықты.
Аз уақыт демалған соң «Қайрат-Жастар» командасының құрамында жаңа ойыншылар пайда болды. Екінші таймның алғашқы минуттарынан ресейліктердің қақпасына Адам Адахаджиев, Артур Шушеначев пен Марлен Айманов қауіп төндірді. Әсіресе, Шушеначев белсенді болған, оны қарсылас кез келген жолмен тоқтатуға тырысты. Осындай фолдардың бірі қауіпті стандартқа алып келді. Адам Адахаджиев айып соққысын орындады, доп Пищулиннің қолынан маңдайшаға тиді, өкінішке қарай, кері серпілген допты қайраттықтар қақпаға енгізе алмады. Гол жақындап қалғандай көрінді, бірақ қайраттықтарға бір нәрсе жетіспей жатты. Ақтық ысқырыққа екі минут қалғанда бар ойы шабуылда болған алматылықтар қорғанысты ұмытып, өз қақпасына жылдам ұмтылыс алды. Константин Шамаев өз мүмкіндігін голға айналдырды – 0:1. Александр Арафьев шәкірттерінде есепті теңестіруге уақыт қалмады.
