«Қайрат» ФК фарм-клубының биылғы жылдағы үшінші ОЖЖ басталды. Алматыда өткен дайындық жұмыстарынан соң «сары-қаралардың» екінші құрамы Түркияның Жерорта теңізінің жағалауында жаттығуға кірісті.
- «Қайрат-Жастар» құрамына 1998 жылдан кіші футболшылар шақырту алды, - деп атап өтті «Қайрат-Жастар» командасының бапкері Александр Арефьев. - Бірақ Бірінші лигада құрамы ең жас команда болатын секілдіміз. Бапкерлер құрамы бір топ дарынды жас футболшыларды шақыртты. 2001 жылы туған бірнеше футболшы бар. Кейбіреуінде тәжірибелі футболшылармен иық тірестіріп ойнайтындай тәжірибелері жоқ. Дегенмен шақырту алған жасөспірімдер жақсы іріктеуден өткен дарынды футболшылар. ОЖЖ барысында төрт халықаралық жолдастық матч өтеді.
- Алматыдағы жиында қандай міндеттер орындалды?
- Төзімділік пен күш қабілетіне жұмыс істедік. Доппен жаттығу артынша теориялық сабақтарға ауысты. Алғашқы екі жиын өткен «Қайраттың» оқу-жаттығу базасы барлық халықаралық стандарттарға сай, кез келген ауа-райында жаттығу жасауға ыңғайлы. Керек-жарақтың бәрі бар.
- Анталияда команда нені шыңдайтын болады?
- «Қайрат» ФК бірыңғай философиясына сәйкес жаттығып жатырмыз. Үлкен ағалары секілді жастар да шабуылда шапшаң ойнайды. Осы сәтті пайдалана отырып, «Қайрат» ФК Академиясының директоры Вольфганг Гейгерге «Қайрат-Жастардың» оқу-жаттығу процесін жасақтауға көмектескені үшін алғысымды айтқым келеді.
