«Қайраттың» израильдік қорғаушысы Офри Арад клубтың баспасөз қызметіне берген сұхбатында Қазақстан OLIMPBET-Чемпионатының 9-туры аясындағы «Ақтөбеге» (2:1) қарсы ойын туралы пікір білдірді.
– Офри, жеңіс құтты болсын! Ойын туралы пікірің қандай?
– Екі ойлы болып отырмыз. Әрине, маңызды ойында маңызды жеңіске жеттік. Бірақ команданың бар ойы Арсенде. Оның денсаулығы нәтижеден маңыздырақ деп санаймын. Жағдайы жақсарып, арамызға қосылады деген үміттеміз. Жеңіске жеткенімізге қуаныштымыз. Бұл біз үшін маңызды. Бірақ біздің досымыз қазір ауруханада және бәрінен бұрын оның сау болғанын қалаймыз.
– Сен ойынды қосалқы құрамнан бастадың, алайда Арсен жарақат алып қалғаннан кейін алаңға шықтың. Толық матч ойнауға дайын болдың ба?
– Өткен апта мен үшін оңай болған жоқ, бірақ әсерлі әрі өмірімдегі ең керемет апталардың бірі болды. Мен Израильде болдым, әйелім қызымызды дүниеге әкелді. Үнемі дұрыс ұйықтай алмай, дұрыс тамақтана алмадым. Ұшақпен ұзақ ұштым. Көп жаттығуды жіберіп алдым, сондықтан бапкер маған қосалқыда қаласың деді. Бірақ мен кәсіпқой ретінде алаңға шығуға әрқашан дайын болуым керек. Әрине, алаңға шығуым осындай жағдайдың кесірінен болғаны өкінішті. Бапкер алаңға шық дегенде 100 пайыз болмаса да, физикалық және менталды түрде дайын болдым. Дегенмен мен командаға осы ойында жеңіске жетуге көмектескім келді.
– Орталық стадиондағы мұндай атмосфера сені таңғалдырды ма?
– «Маккаби» сапында ойнағанымда, «Қайратқа» қарсы ойын өткіздік. Сонда осылай адам көп келген еді. Сондай-ақ Алматыға көшердің алдында, адамдар маған «Қайратқа» өз командасын, әсіресе үлкен матчтарда қызу қолдайтын керемет жанкүйерлері бар екенін айтты. Стадион толы болды, атмосфера – керемет. Біздің жанкүйерлер бізді әр матчта осылай қолдайды деп үміттенемін! Олардың қолдауымен біз осы маусымда керемет нәрселер жасап, әр қарсыласты жеңе аламыз. Олар матч кезінде бізге көп күш береді. Оларға кешегі матчта қолдау көрсеткені үшін алғыс айтқым келеді. Бізді шынымен алға жетеледіңіздер. Клубқа келген сәттен бастап бұл менің есімдегі ең жақсы сәттердің бірі болды.
– Қазақстанда тұрып жатқаныңа 3 ай болды. Еліміз туралы, чемпионатымыз туралы не айта аласың?
– Маған Қазақстан ұнайды. Адамдары мейірімді, маған деген қарым-қатынасы жақсы. Чемпионатқа келетін болсақ, мұнда техникасы жақсы ойыншылар көп екенін байқадым. Ойындар жоғары қарқында өтеді. Көшкенімде Қазақстанды таңдағаның дұрыс болмады дегендер болды. Менің ойымша, бұл чемпионатта мықты ойыншылар ойнайды. Болашақта табиғи алаңдар көбейеді деп сенемін, бірақ жасанды алаңдары болса да, жаман емес. Мен мұнда өз командаммен, жігіттермен бірге болуды ерекше ұнатамын. Бізде киім ауыстыратын бөлмеде атмосфера – керемет. Олар клубтың мақсатына жетуіне көмектесу үшін дамығысы келетін нағыз кәсіпқойлар.
– «Атырауға» қарсы кубок ойынында және «Қайсарға» қарсы чемпионаттың келесі матчында команданың мақсаты қандай?
– «Қайрат» – Қазақстандағы ең үлкен клуб. Сондықтан біз қай жерде ойнайтынымызға және кіммен ойнайтынымызға қарамастан, әр ойында жеңіске жетуге дайынбыз. Біз алдағы матчтарда да, қалған матчтарда да жеңіске жетуді мақсат етеміз.
